Talai-Berriren ekoizpen nagusia Getariako Txakolina Jatorrizko Deituraren produktu klasikoa da: txakolina gisa ezagutzen dugun ardo zuriarena. Baina Talai-Berrikoen bide berriak eraikitzeko gogoak bultzaturik, txakolinaren uxuala eta ardo beltza ere ekoizten dira, beti ere lurraldearen eta bertako ezaugarrien nortasuna errespetaturik.

Talai-Berri Txakolin Zuria

Talai-Berri txakolin zuria bertako bi mahats-klaseekin egiten da: Hondarribi Zuria (mahastiko ehunetik laurogeita hamarra) eta Hondarribi Beltza (ehuneko hamarra).

Ardo gaztea da, txinpartatsua. Graduazio neurritsuduna du (10.5º - 11.5º).Bere-berea duen garraztasuna ere ezaugarri ahaztezina du. Hori-berde kolorekoa, itxura argitsukoa, burbuila fin esanguratsua. Usain jori frutatsuak ditu eta oroitarazten du belar moztu berriaren usaina ere. Dastatzerakoan, ardo zuri lehorra, orekatua eta gorpuzduna dela ohartzen gara. Dastapen-hondarrek halako ezaugarri frutatsu batzuk itzultzen dizkigute.
Urteari urte, halako txakolin bat lortzeko, Talai-Berrik metodo tradizionalak erabiltzen ditu baliabide tekniko aurreratuenekin. Halatan, eta ez da adibide bat besterik, Talai-Berri aitzindari izan zen bai mahatsen hautapen-mahaia erabiltzerakoan eta baita bilketa-kaxen garbiketa prozesuan ere.

Jakue Txakolin Zuria

Jakue osoa txakolin frutatsua da, gustu iraunkorrekoa eta garbia. Lichy bezalako fruta zuri exotikoak gogorarazten ditu. Lasto kolorekoa. Batere herdoil-arrastorik gabea, eta baita muztioaren hartzidurak sortu ohi duen gas naturalak eragindako perla-koroirik gabea ere. Ahoan gantzatsu eta itsaskorra izaki, oso ondo gordetzen du gorpuzkeraren eta garraztasunaren arteko oreka.

Beste behin, metodo tradizionala eta bitarteko aurreratuenak erabili ditu Talai-Berrik Jakue egiteko. Batonageari esker txakolina hain itsaskorra izatea lortu da (upelen hondoan geratu ohi diren liei eragitea deitzen zaio batonage).

Talai-Berri Txakolin Beltza

Dastatzerakoan, berehala nabarmentzen zaizkio anpolai beltzaren ezaugarriak eta baita basoko fruituenak ere. Baina pixkana-pixkana fruitu gorriak oroitarazten hasten da. Leuna, arina, atsegina da eta ardo gazte baten pikardia eta alaitasuna ditu. Garraztasun-puntuak nortasun bizia ematen dio.

Talai-Berri aitzindaria izan da txakolin beltza ekoizten, oraindik bakarra baita Getariako Jatorrizko Deituran. Barietate bakarrarekin egina da, Hondarribi Beltza soilik erabiltzen da-eta txakolin beltza egiteko.

Lamin Ura Uxuala

Kolore gardenekoa, kristaltsu eta malkotsua, baina ez dentsoegia. Distira argitsuak ditu. Atsegina da usaintzerakoan, indartsua baina ez oldarkoia. Hondarribi Zuriaren usain frutatsuak nabarmentzen zaizkio eta baditu halako txigor-ukitu batzuk ere. Ahoan iraunkorra da, arina, freskoa eta baltsamatsu samarra. Harrigarriak baititu leuntasuna eta iraunkortasuna, ez du hainbat eta hainbat uxualen oldarkortasunik.

Lamin Ura egiteko lehen dolare-aldiko muztioak bakarrik erabiltzen dira (kalitate onenekoak) eta gainerako muztioa prentsatu gabe uzten da. Jakinik itsas aldeko uxualek kalitate handiko destilatuak ematen dituztela, eta bertako muztioek ere kalitatea berma zezaketela pentsaturik, hasiera batean senaren iradokizun soila izan zenak produktu interesgarri bat ekarri du, eta ekoizpena urria baldin bada ere, Lamin Ura uxuala guztiz emaitza pozgarria da Talai-Berrikoentzat.

Ttantta Ozpina, Ttantta Gazi-Gozoa

TTANTTA OZPINA, TTANTTA GAZI-GOZOA

TTANTTA izeneko ozpina eta gazi-gozoa egiterakoan, arreta handiko metodo astiro bat jarraitu da, helburu nagusia lortzeko: jatorrizko ardoaren ezaugarriak errespetatzea eta osagai lurrunkorrak gordetzea, gaur egun erabiltzen diren hartzidura azkarreko metodoak saihestuz. 150 urteko esperientzia du Schützebach izeneko metodo tradizional honek. Hondarribi Zuri barietateko ardoa hartu eta, astiro-astiro baina etenik gabe, ozpintze-prozesuari ekiten zaio bakteria ozpingarrien geruza txirbiltsu batetik pasaraziz, aldi berean, baina kontrabidean, modu naturalean eragindako aire-korrontea pasatzen delarik.

Horixe da metodorik egokiena TTANTTA bezalako ozpin eta gazi-gozo goratsuak egiteko. Hartarako, denbora eta errendimendua sakrifikatzen dira, osagarri organoleptikoen mesedetan.

TTANTTA OZPINAREN DASTAKETA

Ozpin gaztea da, ondu gabea. Horregatik, ardoa ozpin bihurtu bezain laster, botilatan gordetzen da, freskotasuna eta indarra gorde ditzan.
Kolore hori zurbila du. Usaintzerakoan, Hondarribi Zuri barietatearen usain frutatsuak nagusitzen dira, eta ahoan, aldiz, garraztasuna indartsua da, ez erasokorra, eta ezaugarritxo zitriko batzuk dituena.

TTANTTA GAZI-GOZOAREN DASTAKETA

Ozpin urtetsua da, frantses haritzarekin egindako barriketan ondua. Egurrak usain bere-bereak ematen dizkio, eta horri esker, gazi-gozoak perfekzioa eta sotiltasun goratsua lortzen ditu.
Urre zaharraren kolorekoa, usainen eragin sendoa du. Dotorezia handiko usain klasikoak eskaintzen ditu, oso frutatsua da, leun freskoa du gorputza, eta garraztasunari ondo doakion gozotasun halako baten ukitua du.